Maraqlı Bayatılar

Bir-birindən mənalı və maraqlı bayatılar

Bülbül dolubdur bağa,
Bir gün salıbdır dağa.
Sayanın qulu olsan,
Saymayana ol ağa.

Zəhmətsiz bir iş olmaz,
Dumansız yağış olmaz.
Göydə bir bulud olsa,
Ondan qarlı qış olmaz.

Əzizim günü günə,
Gəl satma günü günə.
Keçən günə gün çatmaz
Calasan günü günə.

Mən Aşığam, gündə mən,
Kölgədə sən, gündə mən.
Qurban ildə bir olar,
Sənə qurban gündə mən.

Gecə uzun, ay batmaz,
Dərdlilər gecə yatmaz.
Sənun kimi gözəli,
Tanrı bir də yaratmaz.

Gün dolanar, ay batmaz,
Yar dərdi dərdə qatmaz.
Göz görüb, könül sevən,
Yaxın gələr, söz atmaz.

Ağacdan quş tutaram,
Qanadın boş tutaram.
Desələr yarın gəlir,
Bir ay oruc tutaram.

Əzizinəm, oyan, gül,
O yan bülbül, o yan gül.
Könül fəğan eyləyir,
Nə yatmısan, oyan, gül.

Könlüm qaldı səndə, yar
Təbib yardı, sən də yar.
Mən sənə neylədim ki,
Küsüb getdin sən də, yar!

Mən aşiq, gülə baxdı,
Bülbüllər gülə baxdı.
Bir gözəl gülümsədi,
Ağzından gülab axdı.

Gün çəkilib batanda,
Gündüzə şər qatanda,
Ovçu, əlin qurusun,
Marala ox atanda.

Hər sözü qandı ürək,
Səni dost sandı ürək.
Dinəndə dilim yandı,
Dinmədim yandı ürək.

Xəbər getsin o yada,
Yatmış könlüm oyada,
Bivəfaya sirr vermə,
Gedər deyər o, yada.

Nə yatıbsan daş üstə,
Qələm oynar qaş üstə.
Sən haçan ilqar verdin,
Mən demədim baş üstə.

İldırım çaxar gedər,
Su gəlib axar gedər.
Dostlar pis gündə gələr,
Bivəfa baxar gedər.

Alma versəm almazsan,
Sən almadan qalmazsan.
Hansı bağın gülüsən?
Açılarsan solmazsan.

Əzizim, alma qala,
Boşqaba alma qala.
Mən səni gizli sevdim,
Saldılar qalmaqala.

Samavar yana-yana,
Buğlanır yana-yana.
Danışırıq kağızla,
Dil qalır yana-yana.

Maraqlı Bayatılar

Əziziyəm aslandı,
Qılınc qından aslandı,
Tülküdən aslan olmaz,
Aslan elə aslandı.

BAYATİ

Gəlirdim yollarından,
Min bir xəyallarından.
Gəl bir qol-budaq olaq,
Həmayil qollarında.

Gün gələr, batar gedər,
Durnalar qatar gedər.
Vəfalıya can qurban,
Bivəfa atar gedər.

Ana başa tac imiş,
Hər dərdə əlac imiş.
Bir övlad qocalsa da,
Anaya möhtac imiş.

Dağların harayından,
El köçər harayından.
Mərdin daxması yaxşı,
Namərdin sarayından.

Eləmi Baxtıyarım,
Bax elim, bax diyarım.
Üzündə göz izi var,
Sənə kim baxdı yarım.

Dərdin danış bilənə,
İş başına gələnə.
Açma ürək dəftərin,
Hər üzünə gülənə.

Dərdlərə çara təbib,
Düşmüşəm nara, təbib.
Yarımı tapıb gətir.
Sağalsın yara, təbib.

Dağların sal buzları,
Sal daşı, sal buzları.
Hər gecə fərağında,
Sayıram ulduzları.

Gün gedir ilə, dağlar,
Gəlibdir dilə dağlar.
Bülbül kimi hay salıb,
Dönüb bülbülə dağlar.

Əzizim gülüm məndə,
Xarı bülbülüm məndə.
Sən gülməsən, el gülməz,
Sən gül ki, gülüm mən də.

Mərd anadan mərd oğul,
Yada ağa, mərdə qul,
Qorxaq töhmət gətirər,
Baş ucaldar mərd oğul.

Su gələr arxa, haray!
Tökülər çarxa, haray!
İgid qürbətə düşsə,
Çağırar arxa, haray!

Bağ-bağçalar şam olsun,
Ya çinar, ya şam olsun.
Gec gəlib, tez gedirsən,
Otur, qoy axşam olsun.

Açdım, açdım gül oldum,
Boy atdım, sünbül oldum.
Bir dil bilməz quşuydum,
Oxudum, bülbül oldum.

Bağa girmərəm sənsiz,
Gülün dərmərəm sənsiz.
Dağda ahu mələsə,
Bil ki, o, mənəm sənsiz.

Əzizinəm kasa dolmaz,
Fitnəsiz fasad olmaz.
Namərdə boyun əymə,
Mərd əli kasad olmaz.

Xəncər üstə qaş gəlir,
Qoşun başa-baş gəlir,
Qoşuna qurban olum,
İçində qardaş gəlir.

Şah oturar taxtında,
Gileylənər baxtından.
Xoruz kefinə banlar,
Səhər açar vaxtında.

Mən gedirəm o yüzə,
Qayıqda üzə-üzə,
Ay quşlar, siz şad olun,
Meşələr qalır sizə.

Tut ağacın darama,
Əldən çıxar barama.
Halal, zəhmətlə gələr.
Haram gedər harama.

Əzizim bütöv olmaz,
Parasız bütöv olmaz.
Vətənsiz yaşayanın
Ürəyi bütöv olmaz.

Bənzər Sözlər:

• Vətənə aid bayatılar
• Vətən haqqında atalar sözləri
• Laylalar

Axtarış sözləri: asan bayatılar,qəmli bayatılar,şifahi xalq ədəbiyyatı bayatılar,maraqlı bayatılar,bayatilar usaqlar ucun,bayatılar ezizinem,qısa bayatılar