Oxşamalar

Çəkdim cəfasın,
Gördüm vəfasın.
Böyütdüm onu,
Sürüm səfasın.

Oğul ürəkdir,
Qızıl dirəkdir.
Götürün saxlayın,
Qıza gərəkdir.

Başına dönüm, döndərim,
Səni məktəbə göndərim.
Sən məktəbdən gələndə,
Bir cüt qurban göndərim.

Dağda meşəlik,
Gül, meşəlik.
Mən həmişəlik,
Bu balama qurban.

Dağda inəklər,
Otlar, iməklər.
Xonçalı bəylər,
Bu balama qurban.

Tüstüsüz damlar,
Sarı badamlar.
Tənbəl adamlar,
Bu balama qurban.

Atın-tutun bu balanı,
Qəndə qatın bu balanı.
Atası evə gələndə
Qabağa tutun bu balanı.

Tükəndi ahım,
Yoxdur günahım.
Balam böyüsə,
Odur pənahım.

Çaydır, dənizdir,
Quldur, kənizdir,
Balam hər nədir,
Mənə əzizdir.

Mən çalım oyna,
Qurban boyuna.
El-oba gəlsin,
Sənin toyuna.

Ay qız adamı,
Sındır badamı.
Elçiyə çay ver,
Alım qadanı.

Badam badamı,
Oğlan adamı.
Qoy elçi gəlsin,
Alsın qadamı.

Göydəki quşlar,
Bu balama qurban.
Yağan yağışlar,
Bu balam qurban.

Dağdakı atlar,
Quyruğu qatlar.
Göyçək arvadlar,
Bu balama qurban.

Dağda darılar,
Sümbüllü sarılar.
Qoca qarılar,
Bu balama qurban.

Qız bir maraldır,
Gözdə qaraldır.
Həsrət çəkənin,
Rəngin saraldır.

Dağın maralı,
Gözüm qaralı.
Dünyanın malı,
Bu balama qurban.