Vətənə aid bayatılar

Vətən haqqında mənalı bayatılar toplusu

Gəzdim dağı, aranı,
Seçdim ağdan qaranı,
Vətən viran olsa da,
Cənnət gördüm oranı.

Bu yol yola tən deyil,
Yar burdan ötən deyil.
Qürbətdə xoş gün görsəm,
Yenə də vətən deyil.

Aşıq, vətən yaxşıdı,
Köynək kətan yaxşıdı.
Qəriblik cənnət olsa,
Yenə vətən yaxşıdır.

Əziziyəm yaxşı dur,
Yaxşı danış, yaxşı dur.
Yaxşı igid yurdunda,
Pis qalmasa yaxşıdır.

Bu yoldan ötənə bax,
Köynəyi kətana bax.
Qürbətdə gözün açma,
Açanda vətənə bax.

Əzizim gülüm məndə,
Xarı bülbülüm məndə.
Sən gülməsən, el gülməz,
Sən gül ki, gülüm mən də.

Keçmə, Araz dərindir,
İçmə, suyu sərindir.
Həsrət baxan bu ellər,
Sənin də ellərindir.

Araz aşanda ağlar,
Kür qovuşanda ağlar.
Balalar anasından,
Ayrı düşəndə ağlar.

Arazda axar qaldı,
Tərlan uçdu, sar qaldı.
Elimdən ayrı düşdüm,
Gözlərim baxar qaldı.

İgid gərək atlana, 
Atın minə, atlana, 
Mərd odur ki, döyüşdə 
Hər yaraya qatlana. 

Bu dağlar qoşa dağlar,
Verib baş-başa dağlar.
Yarım səndə gəzibdir,
Səni min yaşa dağlar!

Gün gedir ilə, dağlar,
Gəlibdir dilə dağlar.
Bülbül kimi hay salıb, 
Dönüb bülbülə dağlar.

Dağlar marala qaldı,
Otu sarala qaldı.
Yaşıl meşə, göy bulaq,
O da marala qaldı.

Vətənə aid bayatılar

Əzizinəm Qarabağ,
Şəki, Şirvan, Qarabağ.
Tehran cənnətə dönsə,
Yaddan çıxmaz Qarabağ.

BAYATİ

Bostan əkdin, gözlə bar,
Götür belin arxa var.
Səsinə səs verməyə
El kimi bir arxa var.

El batır qəm dəryada, 
Kimə gedim mən dada? 
İgid döyüşdə ölsə, 
Adı qalar dünyada.

İgidin bir atıdır, 
Bir də təmiz zatıdır, 
Koroğluda qoçaqlıq, 
Onun ehtiyatıdır.

Bu yerlər tala yeri,
Bürc yeri, qala yeri.
Qiyamət o gün qopar,
El köçə, qala yeri.

Qürbətdə çana yetdim,
Təng olub, sana yetdim.
Vətənə dönən günü
Dinə, imana yetdim.

Bu yer ellər yeridi,
Şana tellər yeridi.
Qaysaqlanmış yarama,
Təzə millər yeridi.

Yağı gəldi yanıma,
Susamışdı qanıma,
Döndüm qürbət ellərdən,
Qüvvət gəldi canıma.

Qarabağda bağ olmaz
Qara salxım ağ olmaz.
Mənim kimi dərtdinin
Ürəyində yağ olmaz

Əziziyəm bac alar,
Mərd rəqibdən bac alar,
Hər kəsi el istəsə,
Bülənd olar, ucalar.

Əzizim səni, Təbriz,
El sevər səni, Təbriz,
Al qoynuna əzizlə,
Ana tək məni, Təbriz.

Eləmi Göyçəyə mən,
Gözələ, göyçəyə mən.
Qürbətdə həsrət qaldım,
Vətənim Göyçəyə mən.

A dağlar, qarlı dağlar,
Meyvəli, barlı dağlar.
Yarıma yol göstərin,
Gözəl, ilqarlı dağlar.

Eləmi, ulu dağlar,
Uluslu ulu dağlar.
Oğul səndə can verdi
Göz yaşım sulu, dağlar.

A dağlar, sona dağlar,
Söz yetməz sona dağlar.
Yaz fəsli göllərində,
Çalxanar sona, dağlar.

Bənzər Mövzular:

• Laylalar – Oxubil.info
• Azərbaycan Atalar Sözləri
• Vətən haqqında atalar sözləri

Axtarış sözləri: vətən haqqında bayatılar,asan bayatılar,qəmli bayatılar,vətənə aid bayatılar,vetene aid bayatilar,veten haqqinda bayatilar,bayatılar vətən haqqında,,veten haqqinda bayati şifahi xalq ədəbiyyatı bayatılar